مدرسة فؤاد نصر هندي الابتدائية بنات
عزيزي الزائر نرحب بك في منتدانا

ونذكرك بأنك غير مسجل معنا

لذا نرجو منك أن تسجل بالضغط على التسجيل

لتتمكن من المشاركة لدينا ونتمكن من التحاور معك

ولك منا كل شكر و تقدير على زيارتك

مدرسة فؤاد نصر هندي الابتدائية بنات

لا تفكر في الابتكار على أنه دائما اختراق للمألوف أو اختراع فريد... بل فكر فيه على أنه تعديل بسيط في الوضع الحالي
 
الرئيسيةس .و .جالتسجيلبحـثدخولاليومية

شاطر | 
 

 تسمين الدواجن

اذهب الى الأسفل 
كاتب الموضوعرسالة
إيمان محمد دياب
المشرف العام
المشرف العام
avatar

انثى عدد الرسائل : 162
بلدك : ببا _ بني سويف
الوظيفة : معلمة لغة عربية
نقاط : 453
تاريخ التسجيل : 04/04/2009

مُساهمةموضوع: تسمين الدواجن   الأحد أكتوبر 30, 2016 12:15 am


تسمين الدواجن
وبالنسبة للتسمين عندنا نوعين فى الاسواق ( احمر + ابيض )
واالاتنين زى بعض فى كل حاجه مع اختلاف لون الريش
+
مدة دورة تسمين كل منهم عن الاخر

الفراخ البيضا دورتها 45 يوم
الفراخ الحمرا 60 _ 75 يوم

العلف المستهلك لكل نوع ثابت 4 ك لكل طير فى دورتة


طريقة استقبال الكتكوت او الطير عمر يوم


والطريقة دى مستخدمة لكل انواع الطيور ( اللى عمرها يوم ( فراخ _ بط _ رومى _ سمان _حمام )
اولا هنعرض ازاى نجهز المكان من الالف للياء بانتظار استقبال الطير وتسمينه


اولاااااااااااااااااااااااا المكان سواء ( عنبر او شقه او غرفه )


ال 100 متر مربع بيتربى فيهم ( 1000 ) فرخه
يعنى لكل متر عشر فرخات يتواجدو فيه من عمر يوم لعمر الدبيح
ووسائل التهوية فيه تكون جيده جدا جدااا
الطير يجوع يعطش هيعيش
لكن قلة التهوية وعدم تواجدها بالطريقة الصحيحة بتموت الطير
التهويه اهم عامل فى نمو الفراخ البيضا وبسبب التهوية مزارع كتير بيتخرب بيتها
عشان كدة الاهالى الى بتربى عدد بسيط على سطح او بلكونة او كرتونة
والتهوية متاحة لهم بيكبر معاهم الكتكوت اسرع
مش بسبب الاكل لااا التهوية عامل اساسى فى تربية الفراخ البيضا
مبيحبوش الحار ولا يقدرو يعيشو فيه وبردة ملهمش بالجو الباااارد
بس الجو المعتدل سبب نموهم الاسرع
التهوية تخلى فرخ عندك فى شهر ونصف يديكى 2 كيلو ونصف
وعند جارتك اللى كاتمة الفرختين فوق قلب بعض يديها 1 و200 جرام فقط
غير الوفيات مستمرة والامراض


ثانياااااااا التطهير للارضيه


ننضف المكان ونكنسة اوى اوى ونزحف العنكبوت ياحلوين
بالنسبة للى مكانهم اول مرة تربى فيه او خالى من الطيور
ونضيف من 6 شهور
نجيب كلور حامى مش مخفف كلور مركز ريحتة تخنق لو شمتيها
وتحطى 2 لتر كلور على 10 لتر مية ( معدل جردل بويه يعنى
وتجيبى كوباية كبيرة وتاخدى بيها وترشى على سقف وراضية وجدارن تبللى كله
وتكونى فاصلة الكهربا من المكان يافالحة بلاش تنتحرى على ايديا
وتكونى قافلة شبابيك المكان وتطلعى بسررررررررعه وتقفلى المكان لمدة يومين ولا تلاتة
فيروس او حشرات تموت وبالنسبة بقى للى ربت سابق
والمكان عندهم مش كويس وفى اصابة بامراض سابقة
قتلت فراخهم او فاش او حشرات بتعمل هرش او بتتجمع بريش فراخ
يجيبو من الصيدلية البيطرية
مضاد حشرات بايزونول تركيز 60 % ال 100 سم تمنهم 10 جنية وفى صيدلية اخرى بتبيعة ب 15 جنية ( تجارة بقى
اول حاجة بازول مركز بنسبة 60 % اتاكدى من التركيز بلاش يديكى 15 % وينصب عليكى
وتحطى 2 سم لكل لتر وترشى المكان سقف وجدار وارضية تخلية غرقان بالمعقول
وتقفلى باب وشباك طبعا قبل الرش وتطلعى وتسيبى المكان يومين
وتيجى بعدها بيومين
تجيبى فورمالين تركيز 48 % من عند البيطرى بيبقى جراكن كبيرة ال 20 لتر ب 75 جنية
فاطلبى منة يديلك كم لتر على قد حاجتك فقط هو اللتر منة بيستخدم لكل عشرة لترة مية حلو اوى شوفى هتحتاجى كم جردل ميه يغرقو المكان الى عندك ومساحتك واطلبى اللى تركيزة 48 % وحطي لكل لتر فورمالين \ 10 لتر مية
نصيحه
عايزة اقولكم انة مش هتقدرى تتنفسى وهتحسى بتقريص بالجنب
والم شديد نتيجة ريحتة وانة فعلا ضار ع الكلى والكبد بس دا ياعينى للى يوميا بيطهرو الاماكن دى
وشغالين بالمزارع
لكن كونك اول مرة فانصحك تكونى قافلة الشباك الشبابيك اى مكان تهوية اقفلية
وجهزى لخروجك بسرعه واعملى كم جردل الرش بتوعك برا جهزيهم
واياكى طفل يقرب منك ولا يحاول يشم المية هيجيلة اختناق فى ساعتها
ومش هيعرف يتنفس وربنا ينجية بقى انفخى بوشة وطلعية براا بعيداا بمكان هواااااااااااااااااا
بلاش اطفال قولت اهو

لو الاوضة 3 فى 4 متر هتحتاج جردلين او تلاتة ( او حددى بنظرك انتى جهزيهم برا فى الهوا
حطى الفورمالين وافتحى المية فوقة وجهزى شغلك وادخلى بقى للغرفة
ورشى بكوباية كبيرة تساعدك وطول مانتى ماشية رشى الاول ياناصحة جوا
عشان ترجعى بضهرك على برا للهوا سقف ارضية جدرررررررررررررررررررران غرقى المكان ( بعد ماتكونى نضفتية اوى واتكنس اوى واتشال اى اثار لبراز قديم او عدوى منة
وترشى كلووو وتخرجى تهربى اقصد تجرى تصرخى براحتك تعطسى تتفى تنفى براحتك بردة ( عذراكى وقتها  ( نحن السابقون
بس معلش لقمة العيش بقى واحسن من شغل برا عند الناس وقرفهم
واطلعى واقفلى المكان ل 3 ايام وتكونى فاصلة اى كهربا  طبعا قبل الرش
ومننساش وقت التطهير الباب ولا القفص اللى هتحلقى بيه عليهم
طهرية اى شيئ هيدخل ع الفراخ يكون مطهر ونضيييييييييف
وبعد مرور 3 ايام تدخلى المكان
هتلاقيه طاهر 100 % افتحية للتهوية كم ساعة عشان ريحة الفورمالين والخنقة تزول
وارجعى اغلقية واستنى ميعاد استلام كتاكيتك ودى كانت طريقة تطهير المزرعة او اى مكان هتربى فيه


ثالثاااااااااا الجير المطفى

فايدتة بيتفرش منة ارضية المكان كلها قبل وصول الكتاكيت بيوم واحد
ونرش كمان ارتفاع متر من الجدار نرش الجير عليه الفراخ عمر يوم لو نقرت فية متخافيش
صحى لهم وبيخنق اى برص او حشرات
فايدتة للاهميييييه بيعمل طبقة عازلة بين اى براز باقى غصب عنك
بعد التطهير بالارضية وبيمنع الطير انة ينكش برجلة فى ارضية مصابة بمرض سابق
او يطول البلاط لو هتربى بشقة بيعمل عازل يحمى السقف وكمان يمتص الرطوووووبة
الشكارة شكل شكارة الاسمنت تمامااااااا سعرها من 10 الى 12 جنية تقريبا
من عند بتاع الاسمنت ومواد البناء قوليله عايزة شكارة جير مطفى
وهى زى الدقيق الابيض ناعمه بس حامية اوى خصوصا لو نوع نضيف اصلى
خلى بالك منها بعد ماتستخدميها تقفليها برباط جامد او تحطيها بداخل شكارة وتقفل
طول ماهو مدخلهاش هوا وبرد مفعولها هتبقى معاكى لسنة قداااااام مش كل مرة تشترى


رابعااااااااا فرشة الارضيه

تكون نشاره بيضا بتساعد ع الامتصاص جيدا بعد مانرش الجير ويغطى كل الارضية وارتفاع متر من كل جدار نجيب النشارة ونفرشها بالتساوى
لو فى فصل الصيف تكون بمعدل من 2_3 سم ارتفاعها
وبالشتاء بتحتاج تزيد فى كثافتها نقول 10 سم ارتفاعها
عشان بيحتاجو يدفو اوى عكس الصيف  شدة لمعانها وبيضاها وحجمها
ولا ناعمة زى تراب تعمى عيونهم ولا خشنة ومورقة ورق كبير ميمتصش الرطوبة من تحتهم
حجم معقول
نصيحه مهممممممممه
محدش يفرش تبن نهائى بيجيب كساح وبالحار بيزحلق الطيور وبيعمل فرشحه بالرجلين
وبيلم كل انواع الفاش والحشرات الى بتجمع بريش الطير التبن اكبر غللللللللط
اهون عندى تفرشى قطعة قماشة بارضية الكرتونة
او ورق كرتون ( الشيبسى تحتهم ) وكل لما يتبلل تفرشى غيره
ولا انك تجيبى تبن ولا قش يسقعهم ولايمتصو اى رطوبة وبيلمو قرف وخلاص


خامساااااااااا ادوات المزرعة

دفايات سواء لمبه بسلك ومنها هتكون اضاءة وبردة تدفية
للى هتربى بكرتونة يفضل تكون 100 وات اللمبة بالصيف و300 وات بالشتاء
وتتركب وتدلدل على ارتفاع متر من الفراخ عشان متحرقش جلدهم
وتجيب ليهم اختناق واحتباس حرارى ونهجااااان
وفى ناس بتربى فى الصيف من غير اى لمبة بتقفل الكرتونة جانبين منها
وتترك جانبين للتهوية وبيبقو زى الفل
وبنظرك تحددى سقعانين ولا مبسوطين
او دفاية غاز وتحتها صاج من بتاع الكحك تحت شعلة النار الى شغالة
عشان يحمى المكان من اى شرارة نار تشبك بالنشارة لاقدر الله
و ممكن تشتروا طوبة حرارية توضع على نار الدفاية بتدى حرارة مضااااعفة
وتوفر بالغاز لمجرد تقرب اصابعك منها تلاقى بدل النار طالع الف نار ونار
بتفرق معانا وقت الشتاء البارد لكن بالصيف اقل نار تدفى بصراحة
والطوبة دى بتنجاب من البيطرى بيبيعها عندة عايزة تحطى القالب كلة اوك
عايزة تكسرية نصين وتحتفظى بالاخر اوك بس ممنوع يلمسة الميه
يفضل ناشف من النار للارضية يتركن فقطط

العلافات وسقايات ( التسمين
سقاية 4 لتر ب 4 جنية
وطبق الاكل ب 4 جنية
اختارى البلاستيك اللى قماشتة تكون طرية مش بلاستيك خشن للكسر وردىء
ولما الفراخ تكبر وتبقى عمر اسبوعين هتحتاج
العلافة الصاج وسعرها 15 جنية
وفي منها علافة بلاستيك مش صاج ب 8 جنية
بس الصاج احلى بتنزل العلف تلقائى للطير
البلاستيك منها بتحتاج كل كم ساعة تدخلى تهزى الوعاية
وساقية الميه ال 8 لتر ودى سعرها 5 جنية
وسواء عندك ولاهتشترى جديد لازم يطهرو جيدا قبل مايدخلو على الطير
يعنى نجيب بقى ادوات العلف والشرب وكمان لو قماش هتغطى بيه فتحت باب
ولا قفص ونجيب بلاستيكايه بتاعت الغسيل كبيره نحط فيها ميه بكلور مركز بردة
بس لو الادوات دى مش نضيفة وفيها براز ولا كدة اغسليها الاول بالمية وزيت الصابون
بعدين الكلور اخر مرحلة ليهم غطسيهم في الميه بالكلور واضعكى بسفنجة كبيرة فيهم برا وجوا
وطلعى من الميه رصيهم على شكاير نضيفة تكونى ع السطح
تخلى الادوات كلها بالشمس يوم و 2 عشان الشمس هتطهرهم وتطير ريحة الكلور طبعا


سادساااااااااا الترمومتر الحرارى للمكان

بنشترية من عند البيطرى بردة تمن الترمومتر  3 جنية هنعلقة بفتلة فى مسمار بالسقف ولا الجدار
ويكون مكان فى ركن من الاربعة بتوع الاوضة او المزرعة او الكرتووونة  
منركبوش قرب النار ونقول الدنيا دفا اهى لاء يتركب فى ركن من الاربع اركان بالمكان
ويكون الركن البعيد عن النار عشان يلقط درجة الحرارة الصحيحة مش الوهمية
ويكون ارتفاعة فوق راس الطير
كل مايكبر الطير تشدى الخيط شوية ويكون الترمومتر واااااقف
على راس الطير يلقط حرارة الجو على حسب طول وعمر الطير
وبنستقبل الطير عمر يوم على درجة حرارة 35 درجة مئويه
ويوميا تقل نصف درجة  والحرارة المناسبة لطير عمره 3 اسابيع حتى الدبيح
هى 25 درجه مئويه
و أنت بتشتري الترمومتر تسألى الدكتور بيشتغل ازاى
وتخلية يفهمك ومتكسفيش دى ارواح وشغلة هتتعلميها تفيدك ماديا ومعنويا
بعدين ان شاء الله وتقوليلة درجة حراراتة منين
اصلة فية اتجاهين اتجاه ميخصناش واتجاه يخصنا بمصر
الترمومتر سحر هو كمان مفعولة كالسحر
حطية فى وسطيهم وعلقية هترجعى بعد عشر دقايق يكون لقط الحرارة وقالك واقفة جمب اى رقم
تقدرى من خلالة تقولى لاء اللمبة ملهاش عاذة
او لاء عايزة اللمبة تنزل شوية ليهم تحت بس متقربش اوى لتحرق جلدهم
ويفقدو كل المية اللى بجسمهم ومش يكبرو بسببك
خليها على ارتفااااااااااااااع دايما اقل حاجة بعيدة عنهم 60 سم ولا متر
متنزلش خالص عن كدة حرام تسلقيهم
حتى لو فى الشتا متستقلوش باللمبة ال 100 وات دى مفترية اوى وبتحرق بجد
حذررتكم اهو




كدة نكون خلصنا الجزء التحضيرى اللى على اساسه
هنستقبل الكتاكيت ونسمنها
فى الرد القادم


[/color][/color]

_______________________________________________


[ندعوك للتسجيل في المنتدى أو التعريف بنفسك لمعاينة هذا الرابط]


غيابي يعني حاجتي للدعاء...


عدل سابقا من قبل إيمان محمد دياب في الأحد أكتوبر 30, 2016 12:58 am عدل 1 مرات
الرجوع الى أعلى الصفحة اذهب الى الأسفل
إيمان محمد دياب
المشرف العام
المشرف العام
avatar

انثى عدد الرسائل : 162
بلدك : ببا _ بني سويف
الوظيفة : معلمة لغة عربية
نقاط : 453
تاريخ التسجيل : 04/04/2009

مُساهمةموضوع: رد: تسمين الدواجن   الأحد أكتوبر 30, 2016 12:44 am


طريقة استقبال الكتاكيت وتسمينها
من عمر يوم للدبيح
( لكل انواع الطير تمشى الطريقة وامنه جدااا )

ملحوظة هامة

لما نستلم الكتاكيت سواء بالمزرعة توصلنا او نروح نستلمها من فلان ولا علان
ونروح بيهم البيت بالسلامة ان شاء الله نطلعهم من الكراتين او العبوات بتاعتهم
ونفردهم على الارض اللى بقالنا اسبوع بنحضر فيها من تطهير وتعقيم ورش جير وفرش نشاره
وتعليق ترمومتر وتركيب دفاية او تجهيز وصلة السلك ابو لمبه لحد فرد اطباق الاكل على الارضية وتوزيعها
نفرد اطباق الاكل اولا عشان لما الكتاكيت تيجى نوزعهم بين الاطباق ونساعدهم يروحو ياكلو
لو عملنا العكس الكتاكيت بتبقى حركتها بطيئة ومش مستوعبة المكان لسه
فنخاف تدوسى فوقهم فبقى افردى اطباق الاكل وحطى العلف فيها اضمنلك وتوفير للوقت بعدين
على ما يبدؤا ياكلو وينقنقو بالعلف بقى تكونى حضرتى ليهم شوية الميه بالسكر

بس لو الطير بتاعك جاى بينهج والجو وقت الظهر وحار اوى مينفعش تشربيهم ميه


نصيحة


لو الكتاكيت استلمتيهم من بيطرى او واحد بيبيعهم وقت الضهر فى عز الحار
بلاش اول ماتروحى تشربيهم هيتعبو منك ويموت نصهم
اكليهم فقططططططططططططططططططط
الشرب استنى لما يهدو ساعة كدة وبعدين شربيهم
زى البنى ادمين لو نهجان بلاش يشرب ياكل اوك هما كذالك دا لو جايلك الطير وقت الظهر وملحلح
ومطلع لسانة برا من الحار قدميلة الاكل بسرعة ياكل ومكان طراوة بعيد عن الشمس
وبعد ساعة قدمى المية


بنستقبل الكتاكيت البيضا او اى طير عمرة يوم على شوية مية بسكر قدامهم لمدة ساعتين فقط
فابعنيكى كدة شوفى العدد هيشرب اد اية فى ساعتين ودوبى كوباية مية ولا 10 لتر حتى المهم على قد العدد دوبى شوية سكر بالمية ويكون معقولين زى العصير ولا سكرى اوىىىى ولا مر
وقدمية للطير اول شيئ ينزل معدتة
لانه بيعالج ارهاق السفر والركنة على ما تستلميهم او الحر واللى بيفقدة
+
بيعالج اى التهاب حرارى تعرض له الطير نتيجة حر شديد تخيلى انتى فى غنى عن امراض فتاكة بشوية المية والسكر دول


ثانييييييييييييييييييييادواء الاستقبال

عايزة اقولكم احلى اسمين لاحلى دوا استقبال للفراخ البيضا انا بسميه سحر المهنة وسرها ( لبتوع المزارع اى كتاكيت بيضا او اى طيور لو مستقبلنهاش صح من عمر يوم لحد اول اسبوع
بتفضل قرفانا طول الفترة بتاعتها وبتتؤثر باقل حاجة من اسهال لموت لكششان ونفوق مستمر بالعدد
ونبص على نهاية الاسبوع نلاقى العدد خلص موت ومبقاش غير 1 ولا 3 من العدد
والسبب فيروس المعمل اللى فرخ البيض او اللتهاب السره بتاع الطير
او برد الطريق او الحار الشديد والعناصر الى بيفقدها الطير ومش بيلاقى عوضها بعدين عننا
بتكون سبب فى موتة ببساطة رغم انك مهتمة بيه

فأذاااااااااااا اى واحدة تفكر تربى فراخ بيضا تجيب قبل الفراخ الدوا دا
ربع لتر بان فلور هو ب 80 جنية ( سائل لزج ابيض لزج اوووووى )
هيسحبهم ليكى فى سرنجة ويدهملك
+ كولستيين ( شركة ساكو
طبعا مش هتجيبى الربع لتر انتى عددك بسيط هتجيبى حسب مابيشربو فقوليلة عايزة 10 سم بس هاتى منة بردة 50 جرام ( دا بودرة لونها ابيض ريحتها نفااااذة اوى لو شمتيها هتعطسى من قوة مفعولها ف حدود ممكن 10 جنية مثلابصراحة مش عارفة سعر القطاعى انا بجيب النصف كيلو ب 90 جنية بس شركة اخرى بس كويسة بس بما انك هتشترى قطاعى هاتى شركة محترررررررررررررررررررررررمة ومفعولها اضعاف اى تراب تانى متعبى باللعلب وبيبيعوه للناس ( منهم لله
شررركة ساكو فى كل حاجة مية مييييييييييييييييييييييييييييييييييييييييييييييييي يييية
بس ال بان فلور سايل مش بودرة شركة اخرى وملهوش منافس هو نوع وحيد بالسوق فمتخافيش يقلدة او يبيعلك صنف اقل قيمة

جرعة الدوا أد اية ؟؟

لاى طير عمر يوم لسة مستقبلاه عندك او شرياه او فاقص من البيض حتى
1سم بان فلور + نص جرام كولستيين لكل لتر مية
طبعا ال سم معروف نشيل الجزء الخلفى للسرنجة اللى بنضرب بية الحقنة ونرمية
ونحط من ورا ال كم سم بتوعنا على قد المية اللى عايزينها
والجرام نحسبة ازاى ؟
معلقة الشاى الصغيرة = 4 جرام
يعنى نصها = 2 جرام
يعنى حبة على حافة المعلقة = 1 جرام
تمام كدة ؟
المعلقة والسرنجة المقفولة من قدام عشان تحمى ايديكى من السن
ومفتوحة من ورا احفظيهم فى مكان امن بعيد عن اى تلوث هو والدوا
مكان مش شمس ولا برد معتدل


عدد ايام الجرعة ؟

متواصل اول خمس ايام متواصلين بعمر الطير ال 24 قدامهم الدوا كل ماتخلص المية كررى الدوا والمية من جديد ونصيحة مية الشرب الى فيها اى دوا او خلطات شعبية
متقعدش قدام الطير اكتر من 6_8 ساعات عشان بتفسد وتبقى زى قلتها

مميزات الدوا دا اية ؟ عن غيرة من الى بيدهولنا دكاترة البيطرية ويتاجرو علينا فى تراب ملهوش لازمة بالعلاج نهائ
اولا بيعالجو مرض خطير بيجى للكتاكيت من فراخة البيض اسمة سالمونيلا مرض فتااااااااااااك
عندة استعداد يموت كل الكتاكيت فى اطخن مزرعة وصاحبها ياعينى مش واخد بالة منة
وفاكر المعمل مطهر عدتة ونضيف هيفضل الكتكوت ياكل ويموت بردة ويموت مقشش وفاضى والاسهال ماسكو
البان فلور كمضاد حيوى شديييييييييييييييييييييد بيقوى مناعة الطير
وال كولستيين زى الرز يامصريين ثابت مع كل الادوية
وال كولستين بس بيوقف الاسهال فى حالة البرد ( البراز الى لونة ابيض وسايح ع الارض
بس فى حالة اسهال لونة بنى وكتاكيت لسة جاية جديدة وملحقتش تعمل سموم علف بمعدتها
يبقى اسهال سالمونتيلا المعمل لازم لازم بان فلور + كولستين
عشان كدة بنريح راسنا ونقدم النوعين سوا ل 5 ايام متواصلة تظبط معدة الفرخ وحيويتة ويقلبظ بسرعه
الوقاااااااااية خيرا من العلاج طبعاااااااا

نصيحة تخص الدواااااا عشان مش يفسد منك
نصيحة اى دوا غطاه ينكشف او كيستة تتفتح ويتساب مفتوح يبقى فسد وزى قلتة
تاخدى الى عيزاااه وتقفلى قبل ماتملى الميه اقفلى الغطا او اربطى الكيسة قبل اى حاجة
لو فضلتى قافلة الازازة + كيسة البودرة لمية سنة قدااااااااااااااااااااااام هيفضل الدوا فعال
وينفع الدفعة الى هتربيها تانى وتالت وهتوفرى
لو باقى شوية نشارة + دوا استقبال هيبقى عليكى سعر الفراخ بسسسسسسس
اللى هتربى فى كرتونة عدد بسيط او بوكس خشبى
لو عدد بسيط حطيه فى كرتونة شيبسى على قدهم للنوم مفروشة وحلوة
وكرتونة تانية للاكل والشرب اول خمس ايام (واحميهم من العيال بلاش يلعبو بيهم حرام تبهدلوهم
لما يكبرو شوية حطيهم فى كرتونة اوسع والاكل قدامهم عشان مش ينحرمو منهم
الاكل قدامهم ال 24 ساعة هو والمية


العلف العلف العلف

لازم يكون العلف نااااااااااااااعم زى الدقيق او حبة السمسم على الاكتررر
ويفضل قدامهم لعمر شهر
وال 15 يوم الباقين نغير حجم العلف يكون اطخن شوية بروتين 21 %
ودا لضمان كل الكتاكيت تاكل وتعرف تبلع العلف لان فى كتكوت يعرف يمسك الحباية المدورة وكتكوت ميعرفش وبكدة هيجوع ويموت ومنعرفش السبب بالعلف نصيحة يستمر لشهر كامل علف ناعم يناسب الكل ونضمن عدم موتهم وبروتين ميقلش عن 23 %
بيكون مكتوب على جتت الشكارة من برا والتاجر بيوزن ليكى رقم البروتين
عشان تطمنى وريحتة بتقولك انة نفااذ وقوى وتكون شركة نضيفة ومن تاجر امين وعلية سحب
محدش دكانة شغال بحب العلف وتلاقى عربيات نقل بتنزلة وبتاخد منة
غير لما يكون العلف كويس ومش قديم العلف لو غاب بالمخازن 15 يوم من تاريخ تصنيعة بيبدء يكون سموم بتبهدل الطير وبتسود المنطقة بتاعت تحت عد بطنة وتنفخها فاشترى علف طازة يوميا او شكارة تكون لسة متصنعة وتخليها عندك احسن وفى شكاير 25 كيلو فقط توفر بالفلوس والوقت وارجعى هاتى عل قد حاجتك
وابقى شوفى حجم العلف من جوا قبل الشراء عشان مش تتفاجئى انة كبير على منقارهم
ابقى اسالى صاحب المحل عن الاسعار والسعر العالى والنضيف والناس بتسحب منك اكتر نوع ايه واسالى واستفسرى عشان تغير العلف ونوعة كل شوية غلط
اثبتى على نوع نضيف عشان مناعة الطير وحيويتة تفضل ثابتة ( زى لبن البودرة بتاع الاطفال لازم ثبات على نوع عشان الطفل مش يتبهدل



باقى بروجرام الادويه والتحصينات للكتاكيت

فات اول خمس ايام والحمد لله ممتش ولا كتكوت وبرازهم متماسك وزى الفل وحصالتهم ( اللى تحت صدرهم دى مليانة اكل وشبعانين والفرشة تحتهم ناشفة ونضيفة نبطل بقى الدوا ياجماعة ونريح كبد الفراخ عشان كتر الدوا بيتعبهم وبيعملة امراض اخرى ووقت مايتعب نيجى نديلة الدوا
نلاقى الكبد مش مستجاب والسبب اتهرى مننا من كتر الدوا ننزل ليهم بقى اليوم الخامس اخر النهار
والسادس كله مياه بيضا فقططططط تكون منعنشة كدة من الحنفية
نازلة ساقعة مش سخنة بتغلى من حرارة الشمس ( خلو بالكم المية متواصلة قدامهم اليومين دول
تغسل كبدهم وتنعشهم ( والميه اساس الحياه طبعا لحد ها واللى عددها بسيط وعايزة تكمل تربية بالبركة على التهوية الكويسة والعلف النضيف والمية المتجددة اهلا وسهلا هيكبرو ويبقو زى الفل
وقرود كمان
وابقى كل 10 ايام نزلى ليهم شوية شاى مغليييييين اوى زى الحبر وسقعيهم ودوبى فيهم 3 _ 4 اقراص ريفو اسبرين اخضر بتاع الصداع واضربيلك لمونتين تلاتة فى الخلاط بقشرهم يتفرمو زى اللحمة وقلبى الخليط دا بعد الشاى مايسقع طبعا وقلبيهم على بعض وقدمية ليهم بمياة الشرب وميقعدش قدامهم اكتر من مدة الدوا 6 _ 8 ساعات
والمدة بتاعت الجرعة دى 3 ايام ورا بعض 12 ساعة فقط لليوم يعنى نص يوم كدة والنص التانى مية بيضا
وكل مايمر 10 ايام على اخر مرة شربو فيها كدة ارجعى كررى الامر
هيغسل معدتهم ويعدل برازهم ولو فى برد يقضى علية ويقتل السموم بالمعدة وينزل حرارة وسخونية الجو من على عينيهم ورجليهم وكمان لو فى براز مدمم ( كوكسيديا الفراخ ) هيقللة ويمنعة
والاكل المتجدد والميه كمان المتجددة امامهم ونضافة فرشة الطير وتسبيها اولا واخيرا على ربك هتلاقى كل حاجة تمام
شوية مضاد حيوى بشرى يدوبو بشوية مية وقدمية ليهم وقت الحر الشديد يرفع كفائتهم
ويدعولك دعوة حلوة
شوية الشاى الى قولنا عليهم
المية البيضا والتتهوية للطير من اسباب سرعة النمو
دا لحد هنا كان بروجرام التربية للعدد البسيط والاهالى

واللى حابين يجربو التربيه العدد الكبير واللى عايزة تحصن فراخها وتربى على اساس تتعلم وتعمل مزرعة بعدين او تكبر دخلها الشهرى وتكبر عددها وتلعب فى الامان تستنى الرد الجااااااى الاخير
عن الحصينات وايام تنزليها وازاى وامتى واد اية وبالاسعار هى وباقى ادوية الفراخ




الكتاكيت بقى وانواعها

ونشترى انهو وبكم السعر ومنين ويكبر فى اد اية هنشوف بقى سوا
فى مليون الف صنف اثبتت كل المزارع انة
نوع الكب او الجدود انضف الانواع واحسنهم نموا واسرع
ولو غاب عندنا شوية فى ايام تربيتة بيعطى بدل الوزن اضعااااف
يعنى مربح جدا
والكب نعرفة ازاى بقى؟
ياجماعة النوع دا سهل يتعرف عن غيرررررررره بتبقى فى علامات سمره بجناحة او ضهره او رقبتة نقط زى الحسنات كدة ولما تيجى تستلمى كتاكيتك من الى بتشتريهم منه
مش لازم تقوليلة دول كب ولا لاء خصوصا لو انتى حجزاهم على انهم كب ودافعة فلوس على كدة
بصى بعينيكى كدة عليهم لو لقيتى فى ال 50 كتكوت الى حجزتيهم
علامات السمار فى جسم الكتكوت يبقى كب
ولو عشرة بس فيهم العلامات دى عادى صدقى انة كب مدام الدفعة جاى فيها واحد بس بالشكل دا يبقى كله كب صحيح
ووزن الكتكوت حذارى يديلك كتكتوت قد البيضا البلدى ويقولك فرخ ابيض
نمره واحد ولا فرزة اولى ويضحك عليكى
الكتكوت ميقلش وزنة وهو عمر يوم عن 35 جرام نهااااااااائى
وبيوصل لحد 47 جرام عمر يوم
بين دا ودا اشترى وانتى مطمنة تعبك مش هيروح ع الفاضى
من 35 _47 جرام حجم الكتكوت عمر يوم
و عمر 3 ايام بدء ظهور الريش بالجناح
و عمر اسبوعين فقط بيبقى عامل نصف كيلو الفرخ
وفى اكبر وفى اقل بس المتوسط نص كيلو
وعمر الشهر بيعمل وزن كيلو للفراخ العادية اللى هيييييييييييييي جاى منها وبنربيها
لكن لو كتكوتك نضيف هتلاقى الوزن فوق الكيلو وربع وفى كيلو وفى كيلو وربع
وحاجة قشطة بصراحة

اماكن بيع الكتاكيت دى
ناس معروفة ببلدك
او دكتور بيطرى بيحجز عدد للزباين ويستقدمة هو ليهم
او مراكز الزراعة بالبلد
او مدرسة ثانوية زراعية بتبيع
المهم اماكن تكون موثوق فيها
وميكنش فرز اخير ويضحكو عليكى
حجم الكتكوت عمر يوم هو الى يقولك فرز اول ولا اخير
ميقلش وزنة عن 35 جرام ويكون كبير لحد 47 جرام مننساااش


_______________________________________________


[ندعوك للتسجيل في المنتدى أو التعريف بنفسك لمعاينة هذا الرابط]


غيابي يعني حاجتي للدعاء...
الرجوع الى أعلى الصفحة اذهب الى الأسفل
إيمان محمد دياب
المشرف العام
المشرف العام
avatar

انثى عدد الرسائل : 162
بلدك : ببا _ بني سويف
الوظيفة : معلمة لغة عربية
نقاط : 453
تاريخ التسجيل : 04/04/2009

مُساهمةموضوع: رد: تسمين الدواجن   الأحد أكتوبر 30, 2016 12:55 am


اللى بقى عددها كبير وتخاف من اى اعراض او فيروسات وعايزة تحصينات تنزلها بالميه اهلا بيها اتفضلى
بروجرامها اهى عشان توصليهم بر الامااااااااان

نصيحة تخص كل التحصينات

والتحصينات كلها اللى تشتريها من البيطرى تكون انترفيت ( اسم الشركة ) انترفيت
انضف شركة مش هنحصن الفراخ من هنا وتنقلب تموت من هنا عشان شركة معفنة ملهاش لازمة واستغلالية ولا يهمهم فلوس ناس
ولاصحه بشر تضيع ع الارض دا كمان غير الزعل على موت الحاجة قدام عنينا بدون اى ذنب ارتكبناه غير اننا اشترينا تحصينة مكتوب عليها اسم شركة نصابة مش نضيفة ولا بتتقى ربنا
انترفيت اسم الشركة مكتوب بالانجليزى على الامبول تحت

هتعطشى الفراخ ليه بقى؟
اى تحصينة مينفعش تتعمل غير يابعد الفجر بالطراوة او اخر النهار بالمغربية
مينفعش وقت الحار ابداااااا
و التحصينة هتنزل للطيور وبيكون قبلها تعطيش للطير ساعتين فى الصيف و 3ساعات بالشتا
ومدة التحصينة قدام الطير فى مية الشرب ساعتين فقط لاغير
عشان كدة بنعطشهم اوى عشان لما نضع التحصينة قدامهم يخلصو الميه فى الساعتين
ونضمن وصولها كلها للطير مش تترمى ع الارض خساره وبكدة ينجح التحصين بوصولة لكل الطيور
وجبرنا كل الطيرو تقوم تقف وتستنى الشرب بفارغ الصبر وهو دا فايدة التعطيش قبل التحصين
وقبل التحصينة اى طير يشرب ميه عااااديه فقط خالية من اى ادوية او اى شيئ كان ميه فقط على مدار 8 ساعات قبل التحصينة يشربو مية بيضا متواصله ثم نرفع ادوات الشرب من امامهم
ونعطشهم حسب فصل السنة اللى احنا فية يا صيف ( ساعتين تعطيش يا شتااااء ( 3 ساعات تعطيش

اليوم التامن \ تحصينة جمبورا إنترفيت
وهى من عمر 8 _ 11 يوم نزليها فى اى يوم من عمرهم دا بس الاحسن فى اليوم 8
نشربهم الصبح لغاية اخر النهار ميه عادية
بالمغربية او الفجر الصبح نعطشهم قيمة 3 ساعات فى فصل الشتاء
وفى فصل الصيف ساعتين فقط وتروحى للدكتور البيطرى واطلبى منة تحصينة
( الامبول منها بيكفى 1000 كتكوت او فرخة ( اى عمر سواء عندك 50 ولا 200 كتكوت ولا حتى 500 كتكوت امبول الالف هينزل ليهم عادى وكله وقوليلة اعملة ازاى وتركزى كويس يطلعة قدام عينيكى من باب التلاجة مش مرمى ع الرف برا
دى تحصينات لا ليها رف تتركن علية ولا فريزر تترمى فيه يفسدها
مكانها الامن والسليم باب التلاجة او الرف بتاع التلاجه داخليا هيدهولك ومعاه قطعة تلج تحفظ حرارتة على ماتروحى بالطريق بالسلامة اول ماتوصلى البيت طلعي الامبول الزجاجى وحطية بحاله داخل كوباية فى باب التلاجة او ع الرف تحت لمبة التلاجه لحد ماتستعدى لميعاد تحصينتك سواء المغرب او الفجر
اياكى ثم اياكى تحطية بالفريزر كدة باظ التحصين او تتركية برا بدون تلاجة هيبوظ بردة مكانة رف التلاجة او باب التلاجة فقط
الامبول عبارة عن زجاجة صغيرة زى بتاعت روايح الكحك كدة متبرشمة ( نفك البرشام برا عنها ونترك الغطا البلاستيك فوقها نبقى نشده جوا الميه بقى )
الامبول جواه قرص صلب مدور مينفعش تنفتح غير وايديكى جوا الميه تفتحيها وتخلى القرص يدوب بجردل المية او وعاء الميه الى هتدوبى فية التحصينة لاينفع تتفتح منها للهوا ولا ينفع تفتحيها برا الميه
تمام كدة ؟ الامر دا على فكرة بكل التحصينات للفرررررررررررررراخ

تحذيييييير هااااااااااام

ناخد امبول التحصينة وغطاها وزجاجتها ونرميهم داخل كيس بلاستيك ونرميهم بعيد عن مكان تربية الفراخ عشان الامبول بيبقى جواه الفيروس اللى بنحصنة للفراخ وبيتنشط فمينفعش انا بكون بحصن ضد المرض دا واسيب الامبول الى جواة المرض مرمى بمكان التربية غلللللللط
اى امبول تحصينة يترمى بالزبالة بعيد عن فراخك

من حركات نجاح التحصينة
تكونى مجربة قبل التحصين بيوم الكتاكيت بتاعتك بتشرب اد اية فى ساعتين زمن
مثلا شربت لتر ميه بس يوم التحصينة بقى نعملها وندوبها ف لتر الميه دا
نقوم بدل ماندوب التحصينة فى 2 لتر ندوبها فى لتر فقط
وماتفضلش الميه كلها قدامهم وتبوظ فى الساعتين نضمن انة اللتر كلة اتشرب بالتحصينة جواه بالهنا والشفا ومنلاقيش مية كتير باقية غير حاجات بسيطة

بعد اى تحصينة الفراخ تشرب اية ؟
تشرب فيتامين ج الفيتامين دا مفعولة كالسحر
اولا بيرفع كفاءة الطير ويثبت التحصين بجسدة
ثانيا حتى فى الايام العادية لما بنزلة فى فترة الذروة الظهر الحار
بيقلل الاجهاد وبيعوض اى نقص فى عناصر الطير بسبب الحار
وطبعا كلنا لما بنشوف الفراخ البيضا بنلاقيها من ورا لون خلفيتها حمرا ومليانة
ومقلبظة كدة السبب الرئيسى فيتامين ج بدا
بيزود الوزن جداااااااااااا وبيهدى جسم الفرخ وبيعوضة اى نقص وبيثبت التحصينة
سعر الكيلو علبة صفيح هو من شركة ساكو ( 35 جنية ) وفى ناس استغلالية بتبيعو الكيلو ب 50 جنية ( استغلال
المهم سعر كيلو فيتامين ج شركة ساكو 35 جنية
عايزة تشترى 100 جرام على قدك اوك تشترى ربع كيلو اوك
المهم يديلك من كميتك من علبة شركة ساكو مش علبة تانية مضروبة تحت بير السلم
بعد التحصينة ترفعى من قدامهم بعد مرور الساعتين ترفعى بواقى الموجود
وترمية بالمجارى وتعملى ليهم وجبة مية بفيتامين ج وقديمها ليهم لكل لتر مية 1 جرام فيتامين ج
لمدة لا تقل عن 8 ساعات شرب متواصل للفيتامين دا مرة واحدة فقط لا يكرر تانى بعد التحصينة
واتركيهم وانزلى ارتاحى وهما هيكملو شرب لما يعطشو تانى
لان فيتامين ج بيرفع حيوية وبيثبت فحلو اوى بعد اى تحصينة تنزل للطير
يبقى قبل التحصين مية عادية ثم تعطيش ساعتين تلاتة ثم التحصينة ثم فيتامين ج لمدة 8 ساعات فقط كوجبة بعد التحصينة
هيفوت يوم واتنين وشغالة ليهم مية بيضا فقط

اليوم العاشر من عمرهم
اليوم 10 _ 11 _ 12
تشترى 100 سم فيتامين ( أ . د . 3 هــ ) شركة امون سعر اللتر 150 جنية
و 100 سم ( املاح معدنية ) اكمافوس سعر اللتر 15 جنية
تشترى الكمية على قد مابيشربو فى اليوم وتحسبيها على قد طلبك وعددك
تضعى هذا نص يوم وهذا نص يوم لمدة 3 ايام متواصلة
ونفصل بينهم بيوم ميه بيضا اليوم 13 ونرجع ننزل الدوا دا


مضاد سموم للطيور وجرعة كوكسيديا
اليوم 14 _ 15 _ 16

مضاد سموم ( سنر توكس )
سعر اللتر منة 180 جنية سعر ال 100 سم 22 جنية بمعدل 1 سم لكل لتر ميه
الجرعة 12 ساعة فى اليوم متواصلين لمدة 3 ايام

ال 12 ساعة الباقية من كل يوم ننزل قصادة جرعة كوكسيديا ( ألفا كوكس )

يبقى 12 ساعة مضاد سموم من 8 الصبح ل 8 بليل ونص اليوم الباقى
من 8 بليل ل 8 الصبح جرعتة مضاد كوكسيديا اللى هذكرها بالتفصيل اسفل تحت
بمعدل 1 سم لكل لتر ميه نص يوم 3 ايام متواصلة

والوقت الباقى قبل اليوم 17 والكم ساعة الباقين قبل التحصينة بعمر 17 يوم
ننزل ميه بيضا تنضف الكبد وتهيئة للتحصينة

اليوم السابع عشر من عمرهم
تحصينة لاسوتا ودى بتتاخد مرتين فى الدورة عمر 17 يوم
وبعدها باسبوعين تكرر تانى على عمر 32 يوم تانى مرة
سعر الامبول 18 جنيه الامبول بيكفى 1000 بردةهنعطش الفجرية او اخر النهار ساعتين او 3 ساعات ونفتح برشام الامبول ونغطسة فى شوية المية اللى هيشربوهاخلال الساعتين مدة التحصينة وبالهنا والشفاونرفع الباقى بعد الساعتين ونرمية بالمجارى ونجهز ليهم وجبة مياه بفيتامين ج ترفع كفائتهم وتثبت التحصينه تفضل قدامهم 8 ساعات فقط لاتكرر بعدها
زى التحصينة السابقة تمام

اشياء تزود الوزن للطير بصورة غير متوقعة
فيتامين ج
نستخدمة فى الايام العادية عايزة تضعية يوميا لحد يوم البيع او الدبيح يبقى فضل وبركه اوى وسعر الكيلو مش غالى ابدا وجبة يوميا منة فى الميه جرام لكل لتر ميه يفرق اووووى فى شكل وحجم الفراخ
بس هيحول اللحم اسرع فى الطير
يوميا ينزل وقت الظهرية لحد المغرب يكون قدامهم هيفرق بالوزن اوى ويحمر وش وخلفية الفراخ كلها
ويخلى الوزن فى زيادة ملحووظة مفعولة سحر والله

التهوية الجيدة
يكون فى تهوية تدخل هوا جديد وتهوية اخرى تطلع القديم تيار هوا مقابل لبعضو


المياة الباردة
المياه المتجددة من الحنفية باستمرار منتركش قدامهم مية سخنة من حرارة جو
او بايتة من اكتر من 6 ساعات ونقول ماهما قدامهم مية اهو
لاء تجديد المياة ب ينعش الكبد يعنى حيوية الطير بالسما وقوية

كوكسيديا الفراخ
علاجها وطرق الوقاية
هنلاحظ براز لونة احمر كانة دم كتل دم يتبرزو دم
يسمى كوكسيديا الفراخ ( زى الدورة الشهرية للبنات كدة
بينزل دم فى برازهم ولازم نوقفة ونمنعة عشان بيرهق الفراخ وبيخسسهم لو مش اتعالج وحالتة كبرت
دى علاجها وقائى احسن مايكون مرضى فى عمر اسبوعين للفرخ عمر 15 يوم

العلاج الوقائى اهو ندهلهم من عمر 15 احسن بمزاجنا
اشترى فيتامين ك + امبرول بمعدل نصف جرام فقط من فيتامين ك لكل لتر ميه
و 1 جرام من امبرول لكل لتر ميه ونفتح الحنفية فوقهم ونسيب الميه ونقلب الدوا اوى
ونقدمة ليهم ( الاتنين شركة ساكو مننساش سعر نص كيلو الامبرول 75 جنية
سعر فيتامين ك الابيض ( مستورد ) 25 جنية ال ربع كيلو
دايما الامبرول ضعف الكاف فى الكمية 1 جرام من امبروك على نص جرام من ك
اشترى على قد كميتك وكمية شربهم بال 3 ايام
والجرعة هتكون لمدة 3 ايام متواصلة 12 ساعة فقط باليوم
نص اليوم دوا والنص الاخر ميه بيضا تغسل وتنضف وتقوى اكبد

العلاج الاجبارى بعد ما الحالة جاتلنا واثرت على سحب العلف والميه وقفلت نفس الفرخ
يكون عبار عن شراء 100 سم من ألفا كوكس ب 35 جنية من سايل اسمه
عبارة عن 1 سم لكل لتر ( شكل الشاى الصعيدى او الدم وسايل لزج
اللتر منة ألفا كوكس ب 320 جنية جملة
لكن ال 100 سم ب 35 جنية فقط على قد حاجتنا
وفى الف نوع ونوع لعلاجها وبكل الاتمان الغالى والرخيصصصصص

بس انا بقولكم الانواع الى بتجيب من الاخر عشان عمر الفرخ وصحتة ميروحوش فى تجارب الدكاترة المستغلة

حالات الافتراس للكتاكيت خصوصا اول اسبوع تربيه
نتيجة زحمة مكان او اضاءة شديدة فى المكان
نقلل الاضاءة متكونش بزيادة وملعلعة او ضعيفة وتكدر الخاطر
المعقوووول ياجماعة يعنى لمبة نايلون لكل اوضة وخلاص

ونجيب لتر املاح معدنية اسمه اكما فوس ( جميل جدا سعر اللتر منة 15 جنية فقط
فى طبيب هيقولك فى احسن منة ب 50 قوليلة لاء عايزة أكما فوس
( هو لتر بلاستيك مربع الطول لون السايل جواء ميه زرقا وغطا اللتر ازرق

فوايد اكما فوس
بيلمع الريش ويعوض المفقود من عناصر الطير بالوقت الحار والارهاق
وكمان بيضرس الاسنان ميخليش الطير ينقر فى اخوه الى جمبه وينفع للبط والفراخ الكبيرة الى بتاكل وبتعور بعضها وينفع فى حالة افتراس كلى ياكلو مصران بعض جمييييل جدا

والجرعة بتاعتة
بتكون اول يوم فى حالة الافتراس 5 سم لكل لتر ميه
وتانى وتالت يوم بمعدل 4 سم لكل لتر ميه ال 3 ايام متواصلة ال 24 ساعة املاح فى املاح
تعالج الحالة وننتهى من افتراس اوتعالج العرج بردة

فى حالة لقينا اى شنكلة فى الرجلين او عرج فى عمر اول اسبوع فى عمرهم
نستخدم ليهم على طول فيتامين هــ سيلينيوم ( لونة ابيض زى الحليب وخفيف
بنستخدمة لكل الفراخ حتى لو مفيش غير فرخ وحيد بيعرج او مشنكل برجلة كانة
مربوط بحبل ومش عارف يمشى ال 100 سم منه ب 15 جنية ( مستورد هو
الجرعة 3 ايام متواصلة بمعدل 12 ساعة فى اليوم فقط وباقى اليوم ميه بيضا

كدة العلاج ماشى تمام لعمر حاجة وتلاتين يوم

باقى الايام قضوها مية بيضا وببركة ربنا واى اعراض افتراس ولا عرج ولا دم ولا شنكلة
عندكم حلها بالاسماء والجرعه المحددة وكل مايزيد شرب الميه البيضا هتزيد مناعة الفرخ
عمر العلاج مايعالج وميعملش اثار جانبية فدايما تهوية المكان وشرب المية البيضا
والعلف النضيف يوفرو كلهمممم الالاف الجنيهاات بتضيع على الارض


التسووووووووووووويق للطيور

التسويق مفيش اسهل منه ربى انتى حلو بس وسمنى الفراخ وقلبظيها والتجار تجرى وراكى
هما عايزينك وانتى كمان عيزاهم مفيش غنى عن بعض
وسعر الكيلو خلى بالك مش بيحددة التاجر ولا انتى السعر محدد قبلها بكم ساعة ببورصة مصر كلها
على رقبة الكل بيمشى سواء عالى ولا منخفض يعنى سعر الفراخ الحمرا والبيضا مفيهوش سرقة
والدليل لو روحتى للمحل لافلانى تلاقى سعر الكيلو عندة زى المحل العلانى
الا اذا كان بينصب ويزود نص جنية بالكيلو عادى
لكن السعر ثاااااااااابت فى الشرا من المزرعة لكل التجار
وثابت فى محلات الطيوور كتسعيرة محددة زى الدهب قولنا

منقول للفائدة


_______________________________________________


[ندعوك للتسجيل في المنتدى أو التعريف بنفسك لمعاينة هذا الرابط]


غيابي يعني حاجتي للدعاء...
الرجوع الى أعلى الصفحة اذهب الى الأسفل
 
تسمين الدواجن
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
مدرسة فؤاد نصر هندي الابتدائية بنات :: المواد الدراسية :: المجالات :: مجال زراعي-
انتقل الى: